Аңдатпа

Адамдардың бақытты өмір сүруі үшін жасалған ең маңызды жүйелердің бірі ол - ахлақ. Жалпы алғанда, ахлақ - бұл қоғам тарапынан қабылданған дәстүрлердің, әдет-ғұрыптардың, ережелердің, заңдардың, ойлар мен сенімдердің тұтас жүйесі. Сондықтан сенім мен парасатқа ие адам баласын ахлақи қағидалар мен құндылықтарсыз елестету мүмкін емес. Ахлақи принциптер әлеуметтік тәртіпті қамтамасыз етіп қана қоймай, қоғамға ең көркем өмір салтын ұсынады. Бірақ бұл жерде айта кететін маңызды жайт, ахлақи принциптер философиялық ағымдарға қарай бір-бірінен ерекшеленеді. Кейбір ахлақ философтары ахлақты негіздеу және ахлақи принциптерді анықтау тұрғысынан дінді қажетті деп санаса, кейбірі дінді ахлақ саласынан аулақ ұстау керек деп қабылдады. Мұндай әртүрлі көзқарастар мен тәсілдер философия тарихында елеулі тартыстарға жол ашты. Бұл мақалада біз көптеген тартыстардың тақырыбы болған зайырлы ахлақ пен діни ахлақтың негізгі сипаттамаларына және олардың бір-бірінен ерекшеленетін негізгі тұстарына тоқталамыз. Сонымен қатар, ахлақи жүйелерде туындаған мәселелерді біртұтас және сыни тұрғыдан шешуге тырысамыз.

Түйін сөздер: ахлақ, діни ахлақ, зайырлы ахлақ, дін мен ахлақ арақатынасы, зұлымдық пен ізгілік.